Displaying items by tag: بعلبك

بعد حفل بعلبك لهذا العام بعنوان "صوت الصمود"، هاجم عدد من أبناء العمالقة الحفل ولجنته، ومن بينهم وعد نجل الموسيقار الراحل ملحم بركات الذي  قال في تصريح صحافيّ له: "مؤسف أن يتم غض النظر عن هذا العمل الكبير "ومن الحب ما قتل"، مسرحية لغسان الرحباني كان بطلها الكبير ملحم بركات أرزة من لبنان على أرض بعلبك "عيب"، عدم احترام وجود الموسيقار ملحم بركات على أرض بعلبك مخجل، يا ريت ما نطرنا وما حضرنا... شو كنا مغشوشين فيكن. شو متوقعين من بلد ناسي شعبو وتاركو يموت من الجوع لله يرحمك يا بابا".

ردّ الممثل ​باسم مغنية​ على المخرجة اللبنانية ​ريما الرحباني​، ابنة السيدة ​فيروز​، التي شنت هجوماً عنيفاً على لجنة مهرجانات بعلبك الدولية، بسبب الحفل الذي أقامته أمس بعنوان "صوت الصمود"، مشيرة الى أن اللجنة إستخفّت بأسماء الكبار الأخوين رحباني وفيروز وصباح وديع الصافي ونصري شمس الدين وملحم بركات وإيلي شويري وهدى.

وقال باسم مغنية على صفحته:"ريما الرحباني رغم أن هناك وجهة نظر ببعض مما تقول.لكن دائما أسلوبها يتخطى المحظور. أسلوبها في التعبير لا يشبه رقي عائلة الرحباني. هنا لا تصح المقولة(هذا الشبل من ذاك الاسد )،هذه المقولة تجوز على زياد.فيروز العظيمة نحن اولادها. مهرجانات بعلبك لم تخطئ بحق فيروز، بل تفتخر بها."

شنّت المخرجة  ريما الرحباني هجوماً نارياً على لجنة مهرجانات بعلبك الدولية، وذلك على خلفية الحفل الذي أقامته بعنوان "صوت الصمود".

وفي التفاصيل أنّ الرحباني اعتبرت أنّ اللجنة استخفّت بأسماء الأخوين رحباني وفيروز وصباح وديع الصافي ونصري شمس الدين وملحم بركات وإيلي شويري وهدى.

وعلى حسابها على "فيسبوك"، شاركت الرحباني متابعيها بمنشور جاء فيه: " لجنة ولدنات بعلبك

دخلكن الاخوين مش تنين؟ ما فهمت انا اذا بدكن تعيدوا اي عمل من اعمالن

اولاً مش لازم تاخدوا إذن من التنين؟ وخاصة إنّو من سنتين او تلاتة رحلكن إنذار بهالخصوص؟ وإلا نسيتو؟

تانياً لما تاخدوا عمل تتعيدوه الأصول تعيدوه بصيغتو الأصلية المشرّفة إلكن ولغيركن وأكتر بكتير واللي كرمالا انتو عم تعيدوه والا كيف؟ انو شو بها الموسيقى الأصلية تينعاد توزيعا؟ وسلّمنا جدلاً انّو حابين ينعاد توزيعا، مع اني انا ضد ميّة بالميّة ودايما انا مع الأصليّة، هيك عمل في شي اسمو إذن اولاً لإعادة التوزيع، وفي مسؤولية وفي قيّمين آخرين أولى يوزّعوا ويشيروا ويبدوا رأين هاي مسؤولية كبيرة ما بيقرّرها مين ما كان.

تالتاً لما بدكن تستعملوا صور لفيروز مش لازم تستأذنوها؟

رابعاً مش لازم يكون عندكن الحد الأدنى من اللياقة وتعرفوا حجم كل اسم قديه بيكون؟ لأنو الحجم إلو علاقة بالفعل بلا معلميّة يعني

خامساً صح النوم مش للأخوين؟ وما مرقت عندكن بال ٢٠٠٦؟

سادساً ما فهمنا شو خص المتنبي وكيف سلحب ع الأخوين؟ هيدا كان لازم يمرق فرداوي اذا شي متل البقيّة وإلا قصدكن إعتراف انّو من الأساس ملطوش من الاخوين؟

سابعاً مش كان لازم تستشيرونا بإختيار العمل وفقاً للمناسبة؟ انا يمكن كنت فضّلت جبال الصوان على فخر الدين مؤاتية للوضع أكتر خاصة وإنّو كل الشعب إستشهد ع البوابة من الجوع والسرقة والفحش والبطر تبعكن وتبع الحكّام اللي فوقكن! اللي خرّب البلد هنّي امثالكن اللي بيِنهَبوا الدولة ومال الدولة لتمويل هيك مشاريع ومن جيوب الناس هنّي وفاتك الدولة والفاتك بالدولة وطبعاً فاتك بالجمع يعني فواتك الدولة.. إي

ما بعرف شو قصدكن بفخر الدين بهالمرحلة بالذات وهوّي الدين بالذات اللي قضى ع فخرنا وعلينا مش كورونا والا شفتو الغرب هيك عمل نسختوه لأن هيدا اللي شاطرين فيه النسخ!

ثامناً ما فهمنا ليه نينا سيمون وام كلثوم و و و و بيمرقوا سيدا وفيروز بتمرق يتبع؟ أيّة عبقري فيكن ابتدع هالشي؟

تاسعاً الشحادة ع بعلبك مش من شِيَم الأخوين ولا من شِيَم فيروز

عاشراً مجد بعلبك عملوه فيروز ونصري وصباح ووديع وهدى وملحم بركات وايلي شويري........... مش إنتو اللي عملتوه واكيد مش هونيك جوقة مش عارفة المِنجَيرة من المهَيرة يه يه يه والا بيّي راح اللي طالعة متل فريرو جاكو! والله عيب! الله يرحم مي عريضة!

حادي عشر عدا عن إنّو الاخوين مع كل عبقريتن وإبتكارن وعظمتن ونبوغن وفرادتن و و و..... لولا صوت فيروز وشخص فيروز كانوا كسّروا الأرض صحيح بس محليّا وإن فلقت حالا عربياً يجوز! بس مش عالمياً اكيد وهنّي على فكرة كانوا بيعرفوا تماما هالشي وراضيين وما كان عندن ولا أي مشكلة ما بعرف ليه الآخرين عم يجرّبوا يغيّروا هالواقع بإلحاح وإصرار صار مُمل وصارخ وفاشل اخي حلّوا عن هالارث بقى حلّوا عنّو كفاه تشويه وتحريف! فرجونا عبقريتكن بلاه! ورجونا والله مننبسطلكن وانا اوّل وحدة بزقّفلكن وقوفاً بس ورجونا

بعلبك تهدّمت وإنتو هدّمتوها اكتر

القلعة حجار وشو نفع الحجار بلا ناس

آه يابوي شو كان معك حق برحيل الآلهة عن بعلبك

فعلاً راحوا متل الحلم راحوا

خلّيلكن لبنان الكبير إنتو والمُتعربشين الصغار

زوّرتوا التاريخ زوّرتوا البلد وبأمثالكن الله لا يردّو".

رغم اليأس والقنوط والوجع اللامحدود، أعادت مهرجانات بعلبك النبض والأمل لكلّ لبنانيّ، ومن منزله، تحت شعار "علي الموسيقى"، أطلّ المايسترو هاروت فازليان، بموسيقاه على العالم أجمع بأداء الأوركسترا اللبنانية الفلهارمونية، وجوقة الجامعة الانطونية، وجامعة سيدة اللويزة، وجوقة الصوت العتيق ومشاركة الفنان رفيق علي أحمد إحياء للذكرى المئوية لإعلان لبنان الكبير ومرور 250 عاماً على ولادة بيتهوفن.

وقد تفاعل عدد كبير من النجوم مع الحفل الضخم عبر حساباتهم الخاصّة على تويتر، ومنهم :

النجم وائل كفوري :" عـا  كِـل  التـلـفـزيونـات

في ذات المشهد بالذات

انشالله الشعب  اللبناني

بيتوَحَّد متل الشـاشـات".

الفنان عاصي الحلاني:" وجه لبنان الحضاري 

من #مدينة_الشمس #بعلبك ارض المجد والصمود #كلنا_للوطن".

المنتج صادق الصباح :" رغم كل المآسي هذا وجه لبنان الحضاري".

الفنان ناجي الاسطا :" اللي عم نشوفوا الليلة على الشاشات اللبنانية هوي أحلى صورة عن وطن خلق تيكون هيك.. وبس هيك".

الفنان رامي عياش :" #علّي_الموسيقى حتى يخرس صوت السياسيين الفاسدين  والطائفية والحقد

ويبقى  الصوت الوحيد الذي ألبس لبنان  اجمل حلة "صوت  الفن"".

الفنانة اليسا :" كلن حكيو عن بعلبك الليلة. العالم كلو تفرج عالنور والفرح والثقافة والموسيقى. بس يسألوكن عن لبنان، فرجوهن هالصورة وبس. وكل الباقي غيمة صيف ومارقة. لبنان بيشبه صمودك يا بعلبك".

الفنان وليد توفيق :" بعلبك السحر والجمال والفن الاصيل حفل رائع".

الفنان وسام الامير :" مسرح التاريخ والحضارة والثقافة والعيش المشترك أنها بعلبك...انها الموسيقى التي تعطيك المجال لتهرب من الحياة من ناحية وأن تفهم الحياة بشكل أعمق من ناحية أخرى."

برعاية رئيس الجمهورية اللبنانية العماد ميشال عون، وبمناسبة الإحتفال بالذكرى المئوية لإعلان دولة لبنان الكبير، تُقدم لجنة "مهرجانات بعلبك الدولية" ومن إنتاجها، الحفل الموسيقي الضخم "The Sound of Resilience صوت الصمود" للمايسترو هاروت فازليان، الأحد 5 تموز الساعة التاسعة مساء بتوقيت لبنان.

من مدينة الشمس وقلعة بعلبك، معبد باخوس الأثري مهد التاريخ والثقافة والفنون سيُشكل الملتقى لحدث وطني جامع وحفل موسيقي فريد من نوعه، يحمل رسالة أمل بغد أفضل للبنان ووحدة شعبه.

الحفل سيتّبع الإرشادات الوقائية الصارمة من جائحة فيروسCovid-19، ولن يضم جمهوراً حاضراً، بل سيتمّ بثه مباشرة على الهواء. تُنتجه تلفزيونياً وفي إطار خطتها الإعلامية التي أطلقتها بهدف الترويج للسياحة الداخلية قناة الـ"LBCI"، وسيُعرض على المحطات التلفزيونية اللبنانية، منصة "شاهد" العربية، وسائل إعلام أجنبية، ومنصات التواصل الإجتماعي الخاصة بالمهرجان.

الحفل تؤديه الأوركسترا اللبنانية الفلهارمونية، مع جوقة الجامعة الانطونية، و جوقة جامعة سيدة اللويزة، وجوقة الصوت العتيق، وموسيقيين لبنانيين شباب بقيادة المايسترو هاروت فازليان، بالإضافة الى مشاركة النجم رفيق علي أحمد. أما السينوغرافيا، التي يتخلّلها صور من الأرشيف وإبداعات بصرية، فهي لجان لوي مانغي، والإخراج لباسم كريستو.

حفل "The Sound of Resilience"، وتحت "#علّي_الموسيقى"، سيعكس إيجابية وتضامن اللبنانيين في كل بيت وحيّ ومنطقة لبنانية، حيث ستصدح موسيقى الحفل من بيوت اللبنانيين الذين سيرفعون صوت الموسيقى عبر تلفزيوناتهم، وسيتفاعلون كتابة على هاشتاغ الحفل على تويتر بلغة واحدة... لغة التضامن والصمود في وجه الأزمات التي يعيشها الوطن.