حذف موقع يوتيوب أغنية “يمكن خير” للفنان المصري رامي صبري بعد أشهر من طرحها، حيث حققت ملايين المشاهدات، وذلك بعد تقديم عمرو مصطفى مطالبة بحقوق الملكية، مشيرا أن مطلع الأغنية يتشابه إلى حد كبير مع أغنيته “رقصة”.
وفي هذا الإطار، رد رامي صبري على تحرك عمرو مصطفى لحذف أغنية “يمكن خير” وكتب عبر حسابه على فيسبوك: “بالدليل يمكن خير لحن رامي صبري أي حد يقدر يوقف أي أغنية يوتيوب لحد لما يوتيوب يتأكد أنها ملك صاحب الأغنية. بس ردينا بالفيديو علشان كمان الجمهور يعرف ويتاكد اننا مابناخدش لحن مش بتاعنا ونكتب عليه اسمنا..محاربه النجاح مش الحل”.
وأضاف: الحل إنك تشتغل على نفسك وتركز في شغلك وتعمل جديد علشان الجمهور يستمتع مش تحارب النجاح. يمكن خير من ضمن نجاحات رامي صبري وليست اولها ولا اخرها. ربنا يهدي الجميع ونركز في صناعة الموسيقى بدل ما نهدها. شكرا لحضرتكم”.
وسبق أن رد رامي صبري، على اتهام عمرو مصطفى له بسرقة لحن أغنية “يمكن خير” من لحن أغنيته “رقصة”، قائلا: “لا أحب أن أتكلم عن زملائي بشكل سلبي، وعمرو المفترض إنه عشرة كبيرة وصديق واحنا أصحاب وعلشان فيه بيني وبينه عشرة مش هرد بطريقته التي لم تعجبني واللي اتهمني فيها بالسرقة”.
وأضاف”: “مش رامي صبري اللي يسرق لحن ولو هو يعرفني كويس مش هيتهمني الاتهام ده ممكن يكون فيه توارد أفكار وفيه 10 ألحان ممكن يكون فيهم جملة شبه التانية ومرة عملت أغنية لعامر منيب اسمها ده مكنش حب وهندم ليه، بعدها بسنة عمل عمرو دياب أغنية الملحن بتاعها محمد يحيى أغنية ريحة الحبايب، والاتنين نفس الشكل، وده مش عيب ومطلعتش ساعتها وقلت هتخانق مع محمد يحيي وارفع عليه قضية”.
تابع رامي صبري: معنديش مشكلة تقول صوتي وحش أو الأغاني بتاعتي وحشة أو مش نجم ومش ناجح إنما تطلع تقول أنت سرقت دي كلمة كبيرة، رامي صبري مش مطرب بس، أنا راجل دارس موسيقى ومتخرج من المعهد العالي للموسيقى العربية قسم تأليف موسيقى كلمة كبيرة جدًا زي عمر خيرت وياسر عبد الرحمن موسيقار المفروض أنا مبتكلمش عن نفسي كتير، وهو خريج جامعة القاهرة كلية حقوق في الآخر أنا متخصص، فلما ييجي يتكلم الأستاذ مع الطالب معاه مش هنتساوى، الدراسة بتخلي عندك ثقة في الكلام عن الموسيقى، وهو بيتكلم غلط.
أضاف رامي صبري: لما ييجي يتكلم على متخصص وأنت خريج حقوق لازم تكون عارف بتتكلم عن مين، أنا لو مركز معاه سأحاسبه قانونًا لكن أنا بكبر دماغي، مش هو ده اللي يهمني، أنا يفرق معايا جمهور إنه يسمع حاجة حلوة اطلع ملك الفرفشة وابقى لذيذ، هقوله ربنا يهديك، اشتغل أكتر واعمل حاجات جديدة زي ملحنين كبار تانيين زمايلك زي عزيز الشافعي ومدين مش مركزين في اللي انت بتعمله واعملنا شغل حلوة، وأنا شخصيًا لو أنت عملت أغنية حلوة ليا هغنيها ومعنديش مشكلة معاك إنما تقول سرقة ده كلام صغير عيب يطلع من فنان كبير زيك.
وأردف رامي صبري: لو حد اتسرق منه حاجة مبيسكتش، إنما ده توارد خواطر، هو مش على حق فعلًا عشان يطلع يقول سرقة أنا شخص محترم وأحب أحترم نفسي، ولكن كلمة سرقة دي كلمة عيب.
يمكنكم نشر مقتطفات من المقال الحاضر، ما حده الاقصى 25% من مجموع المقال، شرط: ذكر اسم المؤلف والناشر ووضع رابط Aghani Aghani (URL) الإلكتروني الذي يحيل الى مكان مصدر المقال، تحت طائلة تطبيق احكام قانون حماية الملكية الفكرية.
