أطلقت أصالة الفن العربي أصالة نصري أغنية جديدة بعنوان “سوريا جنة” عبر قناتها على يوتيوب وذلك بعد سقوط نظام الأسد.
في التفاصيل، أغنية “سوريا جنة” لأصالة هي من كلمات بتول زيدان ويارا أحمد وألحان وتوزيع علي حسون.
ويقول مطلع الأغنية:” ارفع راسك فوق انت سوري حر .. سوريا جنة والفرح سوري .. يا ياسمينة معانقه الجوري.. منكتب ع حيطانك منحبك ..يا وطني الغالي منحبك”.
ونشرت أصالة مقطعاً من الأغنية عبر حسابها على انستغرام وأرفقته برسالة مؤثرة كتبت فيها:”مشاعر مختلطة كلها قوية خوف أولاً من إنه ينسى الواحد فينا شو كنا وشو أصلنا… نحنا كل أهل سوريا بنشبه أهل الحارة اللي بكل العالم ما في من هيك حارة الناس فيها مخلوطين من ديانات مختلفة وثقافات مختلفة وبساطة وشهامة ومحبة وتسامح وتسامح وتسامح وما في شي حيخلينا نتجاوز ونكبر ونحقق ونعلى غير التسامح وما رح نقول مو وقتها لسه الجرح طازه!”.
وتابعت: “رح نقول نحنا أهل سوريا العظيمة الطيبة سوريا التاريخ اللي بيعشقها شعبها ودفع دمّه فداها ما بدنا نكمل مشوار كله دم وكله قهر وبيرجعنا أكتر وبيقهرنا أكتر لأننا بالآخر هون عنا أهل وحبايب وبدنا نتوحّد وبدنا نعمّر هالبلد الحلوة اللي مافي أحلى من ترابها وشجرها وبيوتها وأهلها الطيبين الحناين”.
وأضافت: “راهنت وبراهن على نجاحنا وإنه الوجع وقف وإنه الفرقة وقفت ومن هون رح نبدى مارح نتطلّع عالماضي وكل واحد فينا رح يعمل شغله ورح نتأمّل خير ورح نتطلّع بالله ورح نترجاه مابقى بدنا وجع بدنا كلنا نكمل بعض بدنا سوريا تلحق وتعمّر وتكمّل وتسبق بدنا سوريا ما فيها ظلم مافيها خوف فيها الياسمين بيغوي وشجر الحور عم يطول ونزرع نرجع شجر من القهر ما كأنه مات قدّ ما هوّه انتحر”.
واختتمت أصالة كاتبة: “بدي أقعد على كرسي بساحة من ساحات الشام عند بياع الصبارة بدي أشتري فستق حلبي من كل البياعين على طريق الربوة بدي شوف سوريا عروس وكلنا نحنا أهلها وبدنا هالعروس اللي تعتّرت وتقطّعت وتنتفت نرجّعلها جمالها وليرجع كلنا بدنا نحبها بدها حب ما بقى بدها ولا نقطة دم بدها فرح بدها أمل بدها ثقه بدها سحر والله بيقدر يمسح على القلوب بالتجاوز ونسمو ونعلو ونبني… بعرف إنه كتير صعب بس نحنا أهل الصعب… وبدنا نهتم بصغارنا اللي شافوا الويلات وصار بدهم قد الكون كلّه رعايه واهتمام… كلي أمل وكلي ثقة نحنا لقدّام ورح نكون وما بقى نقبل ما نكون ورح نبنيها بالحب لأنها بس بالحب رح تعمر ورح تعمر… كلمات: بتول زيدان ويارا أحمد، لحن وتوزيع: علي حسون”.
يمكنكم نشر مقتطفات من المقال الحاضر، ما حده الاقصى 25% من مجموع المقال، شرط: ذكر اسم المؤلف والناشر ووضع رابط Aghani Aghani (URL) الإلكتروني الذي يحيل الى مكان مصدر المقال، تحت طائلة تطبيق احكام قانون حماية الملكية الفكرية.
