كشفت الممثلة المصرية ياسمين صبري، خلال الندوة التي أقيمت لها” على هامش مشاركتها في مهرجان البحر الأحمر السينمائي الدولي، عن رأيها في عدة مواضيع مثل المنصات الرقمية والأدوار التي تتمنى تقديمها وأعمالها المقبلة، كاشفة عن سر تقوله للمرة الأولى عن سبب عدم استكمالها مسلسل “الأسطورة” مع الممثل المصري محمدر رمضان والذي قدمه منذ عدة سنوات.
وعن رأيها في المنصات الرقمية قالت ياسمين صبري: “في ناس في الدلتا والفلاحين والصعيد، ما ينفعش أقول لهم علشان تشترك ادخل على كذا وادفع بالفيزا كارت، أنا عاوزة الجمهور ده عنده تلفزيون، عاوزة أروح له ومش عاوزة أصعبها عليه، وبقلق من المنصات لأن الناس دي مش هتروح لها، وهما شريحة كبيرة جداً في مصر وعلى راسنا، وبالرغم من التطور الشديد جداً للمنصات ولكن لسه فيه أماكن ما عندهاش رفاهية إنه يشترك علشان يتفرج وأنا مش عاوزة أكلف حد، وميزة التلفزيون إن أنت رايح له ببلاش وهتلاقي القهوة فاتحة قناة هوا، وأنا دقة قديمة”.
وعن الأدوار التي تتمنى تقديمها: “الحاجات اللي بتتعرض عليا بتبقى أدوار مستوى راقي، ومملة بالنسبة لي، لكني نفسي أعمل شعبي، والمنتجين يشوفوني في الحتة دي وحتى لو ما رأوني فأنا برضه هعملها”.
كما تحدثت عن أعمالها المقبلة، مشيرة إلى أنها ستركز الفترة المقبلة على السينما، وتحضر لفيلم جديد مع بيتر ميمي عن أول سوبر هيرو مصرية، مردفة: “الحمدلله أنا أملك ثقة كبيرة في عملي، وكل أعمالي السابقة حققت نجاحًا وإيرادات”.
وأكدت ياسمين صبري أنها حرصت على أن تصقل نفسها في مجال التمثيل، لافتة إلى أنها ليست ممثلة أفلام مهرجانات وأنها تعتبر نفسها نجمة شباك، كما بينت أنها لا تعتبر أن التمثيل هو أساس حياتها، وأنها ابتعدت عن التمثيل العامين الماضيين وكانت تعمل على تطوير نفسها في مجالات مختلفة، وتتابع علوم الطاقة.
وقالت إن سلاحها في الحياة هو الاستغناء، مشيرة إلى أنها ترى أن الحياة قصيرة ولا داعي أن نرهق أنفسنا نفسيًا من أجل شيء، وهو ما تفعله في حياتها، وحتى في مشوارها الفني.
وتابعت: “أسهل حاجة عندي الاستغناء، سلاح قوي جدًا في الحياة، الحياة مش مستاهلة إن الواحد يقطع نفسه أو يعيش نفسه في ضغط، الحياة صغيرة مهما طولت”.
أضافت: “المفروض يعيش محترم نفسه وعنده راحة نفسية، مش في سبيل دور تتعب نفسك نفسيا ليه تتعامل مع ناس صعبة أو شرسة أو لسانها حاد ليه متشكرين أوي اللي مكتوب لك هتشوفه سواء كده أو كده وطول ما أنت بتشتري نفسك الدنيا هتشتريك أوي”.
وأكدت أنها تعمل على تطوير ذاتها باستمرار، موضحة أن الشخصية التي يراها الجمهور على السوشيال ميديا ليست شخصيتها الحقيقية، قائلة: “بكتشف حاجات كتير وطول ما الإنسان عايش لازم يطور من نفسه زي الآيفون كل شوية في تحديث، الإنسان لازم يعمل كده في نفسه علشان يعرف يواكب كل حاجة، ولازم تعمل تحديث نفسي لأن ممكن حد نجاحه يبقى أكبر من نفسيته”.
وتابعت: “من يومين كنت في أبو ظبي وكان حدث كبير وميديا وأضواء وناس، لما رجعت الأوتيل وأنا بغسل وشي قولت لنفسي يا ياسمين ده مش حقيقتي ده شغلي، قولت كده علشان الإنسان ميتجننش وميفتكرش أن هو محصلش وأن الكون كله بيلف حواليه، أنا في الحقيقة إنسانة بسيطة جدًا وعادية وبيتوتية جدًا وهادية أوي، ولكن اللي بيظهر للناس دي شخصية الشغل ودي مش أنا”.
وعن سبب عدم استكمالها دورها في مسلسل “الأسطورة” مع محمد رمضان قالت ياسمين صبري: “صناع مسلسل الأسطورة حذفوا كافة مشاهدي في المسلسل، ورفضت استكمال التصوير بعد أن أصبح مدة مشاهدي 5 دقائق”.
يمكنكم نشر مقتطفات من المقال الحاضر، ما حده الاقصى 25% من مجموع المقال، شرط: ذكر اسم المؤلف والناشر ووضع رابط Aghani Aghani (URL) الإلكتروني الذي يحيل الى مكان مصدر المقال، تحت طائلة تطبيق احكام قانون حماية الملكية الفكرية.
